مش سويت نوفمبر خالص

تقريبا كل ما بيقولوا علي نوفمبر انه سويت نوفمبر بتقفل من الشهر بزيادة

أول حاجة انا المفروض باقي ليا مادة امتحنها في الكلية عشان اتخرج خالص من ام الجامعة الوسخة دي وهي في اول نوفمبر وامتحنتها ومستني النتيجة ربنا يكرم واخلص بقي من العذاب ده 

تاني حاجة وفعلا اللي وجعاني من قلبي لما عرفت خبر موت هيثم أحمد زكي , من ظروف الوفاة انه اتوفي لوحده وانه راح مشرحة زينهم عشان يبان سبب الوفاة وانه ابوه وامه عانوا برده واتوفوا بسبب السرطان 

وان هو قد ايه عاش فترة كبيرة من حياته لوحده تماما : شغله - كام واحد من صحابه وبس مفيش أهل مفيش أي حاجة في الدنيا لوحده 

افتكترت تفاصيل موت عمي الله يرحمه ويتجاوز عن سيئاته ويسكنه فسيح جناته لما اتوفي لوحده في البيت وهو كان مريض سكر وقد ايه احنا كلنا اخواته وولاد اخواته قصرنا في السؤال عليه دايما واننا نزوره وانه عاش في مشاكل وهموم كتير كان مخبيها تقريبا عن الكل

قعدت افكر هو انا اعرف كام واحد عايش الدايرة دي من صحابي وناس كتير كنت اعرفهم , الحياة قاسية جدا بكل ما تحمله الكلمة انك لو مش متجوز خلاص انت كده بقيت عايش لوحدك حتي لو انت قاعد مع اهلك كده زيي بس اهلك بعد طول العمر هيقابلوا رب كريم وكلنا هنقابل رب كريم فلو ما فيش حد معاك بمعني  اصح اتجوزت لان حتي لو معاك صحاب مسير الصحاب الحياة بتسحلهم وبالذات المتجوزين لان الدنيا بتبقي صعبة ولما ربنا بيرزقهم بأولاد الموضوع بيقي اصعب 

ولو ليك أخوات برده الأخوات الحياة بتاخدهم وفي اللي بيسافر زي اختي بشوفها من السنة للسنة واختي التانية مرة كل اسبوع وعلي حسب الظروف لو كنت موجود 

اللي بيتبقي ليك هو رفيقة الحياة مراتك فعشان كده لما تختار اختار اللي هتكمل معاك في الطريق سواء ان كان في ضلمة او نور طريق سالك او متكسر ومليان خوازيق مش حد عاوز يبقي معاك لمجرد انه ما يبقاش لوحده عشان تفرق كتير لان وقت ما الدنيا هتبقي صعبة عليك هيسيبك ويشوف غيرك

يمكن انا كنت من جوايا بحب واحدة ولحد دلوقتي مازالت بحبها بس للاسف شايفها ما تستهلش الاختيار انها تبقي رفيقة الحياة معايا مش عشان بحاسبها علي غلط حصل في الماضي وانتهي لأ , عشان الماضي مكمل وانها كدبت عليا كتير وانها فكرت فيا مش عشان انا عاوزة اكمل معاه بدافع الحب واني استحمل معاه قرفه وقرف الحياة واحنا سوا لا عشان ما تبقاش وحيدة واني بحبها من غير مصلحة فقالت اجرب نصيبي معاه بعد فترة من اللا مبالاة لمشاعري أصلا وانها جت عليا في اوقات كتير واستحملتها بدافع الحب وانها هتقدر ده لكن للاسف ده ما حصلش وأول ما اتكلمت بصراحة في ظروفي وان امي وابويا مسئولين مني عشان كبار في السن ابتدت الانانية تبان من ناحيتها وان الموضوع بقي عرض وطلب وانت معاك ايه ومش معاك ايه ! 

والله انا بالرغم من كل ده لسه بحبها وبدعيلها من كل قلبي ان ربنا يوفقها وينور بصيرتها وقلبها ويبعد عنها ولاد الحرام اللي عاوزين اذيتها وانه يرزقها من واسعة وتبقي احسن حد في الدنيا وربنا يرزقها بحد يحبها وتحبه ويعوضها عن كل التعب اللي شافته 

انا عارف ان الموضوع منتهي عامة ومفيش حاجة بتتصلح وان خلاص المفروض أقفل الصفحة دي من حياتي بس المشكلة اني انا عاوز وقت عشان اقدر اعمل ده وان يبقي في شخص كان معاك لمدة سنتين وفجأة خلاص مش موجود في حياتك الموضوع عاوز وقت والواحد راضي بترتيب ربنا ليه الحمد لله علي كل حال