Shorty Thoughts

برده الواحد كل ما بيحس انه قرب يطلع من السجن اللي هو فيه ده عشمه يروح في الاخر ويكسر خاطره ...اللهم لا اعتراض لسه قاعد في سجن التعليم سنة كمان من بعد ما كنت بعشم نفسي اني خلاص هخرج منه بعد كام يوم أنا ساعات بقعد افكر واقول لنفسي انا بيحصل معايا كده ليه وأني بعاني في التعليم كده مقارنة بغيري ....الصراحة ما بوصلش لاجابة مقنعة خالص كل اللي انا بوصله ان ربنا عامل كده لحكمة انا مش عارفها او مش شايفها دلوقتي وممكن اعرفها قدام وممكن ما اعرفهاش بس اي كان انا راضي الحمد لله بقضاء ربنا وشاكر نعمته وفضله عليا ولعله خير لعله خير 

دلوقتي الواحد الحمد لله خلص الامتحانات وبغض النظر عن القلق من النتيجة وجو الرعب اللي بعيش فيه كل سنة ده ...لكن مش باقي ليا الا مناقشة مشروع التخرج الحمد لله ربنا سهلنا لينا والمشروع اشتغل ومش باقي غير بس تقفيل التحابيش بتاعت من حيث الكتاب والشكليات اللي ملهاش عازة دي المشكلة الحقيقية بقي في مرحلة ما بعد البكالوريس ..ان علي قد ما انت بتبقي سعيد انك خلصت التعليم كله علي قد ما بتبقي تايه وقلقان يمكن في حالتي انا مش تايه بقدر اني قلقان ما اعرفش احقق اللي قعدت اعشم نفسي فيه طول فترة قعادي في الكلية اللعينة دي كل اللي بتمناه من ربنا انه ينور بصيرتي ويعوضني خيرا عن شبابي اللي افنيته في كلية هندسة في قسم اتصالات اللعين كفارة الحرية للجدعان