Shorty Thoughts

كل سنة وانتوا طيبين ....سنة 2013 خلصت بكل مشاكلها وقرفها وكل حاجة حصلت فيها من اول ما ابتدت لغاية امبارح ... وسنة مرت زيها زي اي سنة ....الواحد بيحاول يحاسب نفسه ويتمني حاجات انها تحقق في السنة الجديدة عن السنة القديمة ,كل اللي انا بتمناه ان شاء الله السنة دي اني اقدر اوصل لبكالوريس عشان اخلص دراسة بقي الواحد زهق واني كمان اقدر انفذ المشروع بتاعي ويظهر للنور ويبدأ في خطوات النجاح .ويا رب تكون السنة دي احسن بالنسبة لمصر والعالم جميعا لو بطلنا نحلم نموت  

بقالي بتاع تلات او اربع ايام عمال بفتكر ذكريات فات عليها سنين ......تقريبا افتكرت كل الناس اللي مروا في حياتي الفترة دي .....وكنت مستغرب ازاي انا افتكرت الناس دي بأسمايها وبالمواقف اللي حصلتلي معاهم من اول يوم ليا في المدرسة لاخر يوم في المدرسة وبعدين لاول ناس عرفتهم في الجامعة ....واول شلة اتصاحبت عليها في اعدادي وبعدين لما طلعت اولي وبعدين تانية غير الصحاب افتكرت كمية الافتكسات اللي كنت بعملها في الوقت ده واني ازاي كنت بحاول ابسط نفسي بأقل حاجة فعلا العمر بيعدي وكل ما بيعدي بتكتشف ان الحجات الحلوة اللي كانت في حياتي عمالة تقل تقل لغاية ما بقتش تقريبا موجودة .....اخرة الرغي اللي عمال ارغيه ده اني نفسي ارجع بالزمن لورا شوية يمكن اعرف اعيش اللحظات الحلوة مرة تانية فترة اطول لكن يا حسرتاه ....علي رأي الست قول الزمان ارجع يا زمان 

الواحد بقاله يومين كده عنده فراغ تفكيري قوي ....يعني مثلا كل ما افكر اني اذاكر المواد اللي عندي في الكلية دماغي فاضية ....اجي اقول هذاكر عشان الكورس الاقي دماغي فاضية ......ما فيش امل غير اني افتكس اي فكرة جديدة واشتغل عليها عشان تطلع للنور برده الاقي دماغي فاضية من سنة كده واحد صاحبي قالي انه هيعمل كتاب قولتله ماشي ....المهم الوقت عدي ووصل انه فعلا خلص الكتاب كتابة لكن لسه باقي ليه انه يراجعه ويشوف اي دار نشر عشان تنشره .....الفكرة في اللي انا حكيته ده ان دماغه فضلت شغالة وبتفكر مش فاضية زي حالاتي وفضل يفكر انه ازاي يكمل الكتاب وقعد يشتغل عليه لغاية ما خلصه يعني من الاخر الواحد عنده المقدرة انه يفكر ويبدع ويشتغل علي افكاره بس الفكرة كلها في الارادة من غير حدود للسن او البلد او اي عوائق تانية بنتحجج بيها  حاليا كل اللي بفكر فيه اني اتخلص من الفراغ التفكيري اللي انا فيه ده واحاول اعمل حاجة تشغل دماغي من تاني زي ما كانت قبل كده وبتفكر وشغالة حلاوة .......ربنا يكرم 

باقي من الزمن يومان وارجع للمخروبة قصدي الكلية .....المكان الذي لا اطيقه هادم اللذات ومفرق الجماعات .....ايه الهبل اللي انا بكتبه ده علي العموم مش ده الموضوع ........اللي بحاول اوصله ان من ايام ما كنت صغير وانا كنت بكره الكام يوم اللي بيقبوا قبل الدراسة مش عارف ليه ......وكنت دايما بالذات اليوم اللي كان قبل المدرسة كنت بدخل السرير بدري عشان اهلي وكده بس ما كنتش بنام الا علي الساعة 4 الصبح عشان ما اعرفش اقوم اروح المدرسة وفي الاخر كانوا بيصحوني واروح غصب عني بس كنت بتبسط اني بشوف صحابي وبسلم عليهم ولما كبرت ودخلت الجامعة بقيت اكره الدراسة اكتر ما كنت بكرها ايام المدرسة ....لاني عايش في المكان ده معزول وغير متأقلم مع العالم ده ورافضه من جوايا وبقعد اعد الشهور والايام والساعات اللي باقي ليا في الكلية دي  هانت خلاص باقي من الزمن 12 شهر واتخرج من المخروبة دي ان شاء الله اللهم امين 

سألت نفسي كتير ما رستش يوم علي بر ....انا اللي فيا الخير ولا اللي فيا الشر....مليان عيوب ولا خالي من الذنوب ولا الاغنية دي بتوصف حالي في اللحظات اللي بكتب فيها الكلام ده دلوقتي .....حاسس اني ما عنديش اي هدف في الحياة واني عايش كده وخلاص ...مجرد بني ادم ربنا خلقه بيأكل ويشرب وينام وخلاص ....غير مفيد لنفسه او للي حواليه ....اكيد ربنا ما خلقش اي حاجة ملهاش فايدة بس الفكرة اني مش عارف هدفي في الحياة .....هلاقي ناس تقولك عبادة الله وعمارة الارض....عبادة الله مش مختلف فيها معاك لكن عمارة الارض ليها اكتر من تفسير .....هل معني عمارة الارض اني اعمل حاجة مفيدة للنفسي والناس اللي حواليا واي مكان اقدر اوصله وبأي وسيله اي كانت هي بسيطة ......ام اني اشتغل واعمل اسرة واخد بالي من اسرتي واصرف عليهم وخلاص يبني انا كده حققت عمارة الارض ساعات الواحد بتيجي في باله الاسئلة دي وبيبقي محتار في اجابتها ....او ان اجابتها بالنسبة ليه مش بتبقي مقنعة كفاية محتاج اني الاقي الطريق الصح اللي اقدر امشي عليه عشان تتغير حياتي للاحسن ......ربنا يكرم وان شاء الله بس شكلي هتعب شوية عقبال ما الاقيه 

دايما انا غرقان في مستنقع اليأس ....كل ما احاول اطلع راسي وابدأ اشد جسمي عشان اخرج ارجع اغطس تاني فيه....لما ابتديت الكورس بتاع ال CCNA كنت فاكر ان ده هيديني دفعة معنوية قوية واني اقدر احسن شوية بشوية السلبيات اللي موجودة عندي  عملت بداية كويسة ...متابعة للكورس وحضور تام وكتابة الملخصات لكل حصة باخدها في الكورس ....حصل اضطرابات في البلد بقي في حظر تجول والكورس وقف وكل حاجة وقفت بالنسبة ليا ....حتي علاقتي ما بيني وما بين ربنا اتقطعت بعد ما كنت بعمل محاولات اني ارجع يبقي في عمار ما بيني وما بين ربنا واني مش بفتكر ربنا بس عشان الشدة تزول واني دايما بدعي ربنا في السراء والضراء  محتاج حاليا اني اقعد مع نفسي اصحي ضميري اللي في الغيبوبة ومش مقدر اي حاجة في الحياة ....بالظبط ما افرقش ما بيني وما بين الحيوان بيجري ورا شهواته (اكل وشرب ونوم ) ما عندوش اي قدر من المسئولية تجاه نفسه او اسرته او وطنه او دينه يا رب افوق من الغيبوبة دي قبل فوات الاوان 

هوا ليه الواحد بقي ما عندوش اي نوع من الارادة انه يعمل حاجة مفيدة .....الواحد ابتدي يرجع للكسل وانه عايش بلا هدف بعد ما كان عندي طاقة ايجابية رهيبة لكن ما استمرتش كتير ....مش عارف بقي بسبب الفشل في الكلية ولا بسبب الاحداث اللي بتمر بيها البلد ومش مخلي الواحد ليه نفس يعمل اي حاجة وغير كده الواحد مش عارف يفرح ....لغاية دلوقتي مش حاسس بطعم رمضان واننا فيه ....مجرد اني بصوم وبصلي وبقرأ قران لكن الفرحة علي وشوش اهلي والناس اللي في الشارع مش باينة كله مهموم يا رب الواحد يطلع من حالة الاحباط اللي فيها دي بمنتهي السرعة لانها لو استمرت كتير من الصعب الرجوع ....ربنا يعدي البلد من اللي فيها ده علي خير ان شاء الله 

اوحش حاجة بالنسبة ليا هي الانتظار ......حاجات كتير اوي بستناها في حياتي زي ان اخلص دراسة واني اخد الاجازة عشان اعمل حاجة معينة واني اتخرج من الكلية عشان ادور علي شغل وحاجات تانية كتير زهقت من كتر الانتظار وما بقتش قادر استحمل لحد امتي هفضل قاعد مستني .....يا رب صبرني علي اللي انا فيه وساعدني وافرجها من عندك يا كريم معاناة النتيجة بتاعت كل سنة #كلية_مقرفة 

الحمد لله الواحد رجعه الامل من تاني ......يا رب تكمل علي خير ان شا لحظات تاريخية مش هقدر امحيها من الذاكرة لغاية ما اموت ....في الثلاث سنين دول حصلت احداث ولا كانها حصلت في تلاتين سنة يا جدع ‏#مصر

اكتر حاجة باسطاني من اللي بيحصل ده ان في نقطة ايجابية بسيطة ......ان المصريين ايد واحدة وما تعرفش تفرق ما بينهم وعمرهم ما هينجروا لحالة الحرب الاهلية مهما لو حصل وكمان انهم ناس عندهم العفو عند المقدرة ونسيان الخلافات وتقديم مصلحة الوطن بالرغم بعض الحالات الفردية اللي بتبقي موجودة في اي مجتمع .......لو عرفنا نستغل الطاقة دي في حاجة ايجابية والله البلد دي هتبقي كويسة جدا في فترة قصيرة .......ربنا يعدينا من الازمة دي علي خير ......معدن الناس الكويسة بيبان وقت الازمات ‏#مصر_التي_في_خاطري

الواحد النهاردة سعيد باللي شافوا في مظاهرات النهاردة اللي كانت في الاتحادية .....حاجة في منتهي الرقي والتحضر ما فيش اي حالة تحرش او سرقة او عنف حصلت وده يدل علي ان الشعب من النوع المسالم  مش بيميل للعنف زي ما بعض الناس بتحاول تبين ده  كل فئات المجتمع المصري نزلت من اصغر واحد لاكبر واحد .....الطبقة الفقيرة والطبقة المتوسطة وحتي طبقة الاغنياء كمان نزلت ....رجالة وستات عواجيز...شباب....بنات...اطفال كله نزل بلا استثناء حتي الصحيح والعليل نزل الواحد فعلا حس انه ما بين وسط اهله وناسه ....فخور اني مصري فعلا وبقولها من جوه قلبي وانا مبسوط وسعيد 

من الاخر كده يعني الفئتين اوسخ من بعض سواء اللي في السلطة او اللي في المعارضة .....ما حدش فيهم همه مصلحة البلد وكلهم بتوع كلام وشعارات علي الفاضي لما توصل ان في دم يسيل وان في ناس تموت عشان اختلاف سياسي وان اخ ممكن يقتل اخوه عشان كده .....ملعون السياسة علي اللي فيها علي اللي عايز يدخلها ما دام وصلت ان الانسانية بقت لا شئ قصاد السياسة واني ممكن اعمل اي حاجة عشان اوصل للي عاوزه ....يبقي عليه العوض ومنه العوض في البلد دي سؤال بس للناس اللي موجودة في التحرير ....في اي حد من السياسيين المعارضين البازين في الشاشات معاكوا في الشارع #المعارضة_فئة_انتهازية_بحته سؤال بس معلش للناس المؤيدة لمرسي اللي في رابعة دلوقتي .....في اي حد من اولاد القيادات اللي في الاخوان معاكوا في الشارع ........؟؟؟؟؟؟ يا رب الرسالة توصل

الواحد ساعات بيحس انه وصل لحالة انه مش عاوز يعمل حاجة في حياته من الاخر عاوز يعيش كده لوحده يأكل ويشرب وينام ......مش عاوز يستخدم مخه في حاجة خالص .....يمكن عشان هو وصل لدرجة قوية من الاجهاد الذهني خلته يوصل للمرحلة دي فا المفروض بيحتاج انه يريح البطارية شوية وده اللي انا بمر بيه حاليا  بس لازم تشحن البطارية صح بتوصيلة صح مش غلط عشان البطارية ما تبوظش خالص  من الاخر لازم تعمل حاجات ايجابية ترجع بيها نشاطك الذهني عشان توصل لاعلي معدلاتك في التفكير والابداع وده اللي بحاول اعمله .....ربنا يعيني ويقدرني دايما علي فعل الخير 

الواحد الحمد لله في احساس سعادة رهيب لا يوصف .....ربنا فعلا بيعوض الواحد لو حصلتله حاجة وحشة بحاجات حلوة في حياته ....يعني مثلا انا كنت في يوم في الكلية وكان في fun day ساعتها وشوفت دفعتي اللي المفروض اتخرج معاهم بيرقصوا وبيغنوا ..الواحد كان فرحان ليهم جدا بس كان في نفس الوقت حاسس انه مكسور وبيلوم نفسه انه ضيع وقت كتير في حياته ما استفدش بيه في حاجة مفيدة .....الحمد لله علي كل شئ  لما روحت البيت كنت في قمة الزعل لاقيت واحد صاحبي عزيز عليا بقاله مدة ما بكلمنيش وقالي عاوز اشوفك وبتاع وسبحان الله حاجات كتير حصلتلي اليوم ده عوضتني عن الزعل اللي انا فيه ربنا ما يحرمني من نعمة الصحاب الحلوة اللي في حياتي 

الواحد اديه شغال في المشروع بالرغم من الحاجات الكتير اللي في دماغه .......مشكلة الواحد فينا انه ما اتعلمش انه يعمل كذا حاجة في حياته علي التوازي مش تبقي علي التوالي .....طبعا انا لسه بحاول اطبق الموضوع ده علي قد ما بقدر لكن العملية بتحتاج قدر كبير من التنظيم ووضع الاولويات اللي محتاج تنفذها الاول ....الواحد لازم يبطل العشوائية في العمل وينضف دماغه شوية المهم كفاية كلام وخلينا في الشغل اللي ما بيخلصش 

الحمد لله بدأت اولي الخطوات في تنفيذ مشروعي وان شاء الله هتتم تكملة باقي الخطوات بعد ما اخلص من صداع الامتحانات ده ....اللي عاجبني في الموضوع اني حولت الفكرة من دماغي علي الورق وقعدت ازود في الافكار لغاية ما ابتديت اخد اول خطوة ....اخيرا علمت شئ ليه قيمة في حياتي بدل ما كنت عايش مش حاسس ان بعمل حاجة مفيدة في دنيتي ان شاء الله انا حاسس انه هيبقي فتحة خير عليا واستفيد منه معنويا وماديا 

مشكلتي دايما اني حاصر نفسي في دايرة ضيقة من المعارف والاصدقاء ومش عاوز اطلع منها .......وده في حد ذاته مشكلة كبيرة هعاني منها لو استمريت علي كده لما اتخرج ....بس الحمد لله انا ابتديت اخف منها شوية اهوه  يعني ابتديت اتعامل مع ناس اكتر في الكلية ...ابتديت ابقي مرن ومبقاش عندي جمود في الفكر زائد اني بقيت بحاول اكون صداقات ومعارف بأي وسيلة متاحة ليا زي المشروع اللي بعمله في المتحف المصري او عن طريق الانترنت ....وبقي عندي حالة مجموعة من الاصدقاء من مختلف انحاء العالم بتسفيد من ثقافتهم وخبرتهم في الحياة  لازم الواحد يستغل الانفتاح اللي بقي فيه العالم في حاجة مفيدة تساعد علي تكوين شخصيته وتحسين مهاراته ...لكن احنا للاسف معظمنا بيستخدمها الاستخدام الخاطئ فيما لايفيد لازم الواحد يستمر في تطوير نفسه ما ينفعش يقف محلك سر كده ....نفسي واحد صاحبي عزيز عليا يحاول يطبق الكلام ده وما يخفش ويبقي عنده ثقة في نفسه اكيدة

النهاردة قضيت يوم من احلي الايام اللي قضيتها في حياتي ......خصوصا اني نزلت مع صاحبي اللي بقالي مدة كبيرة ما شوفتهوش وعملنا شغل عالي علي مشروع ان شاء يبقي فتحة خير ليا وليه في المتحف المصري .......ربنا يكرم ان شاء الله ويكمل علي خير يا رب دايما تبقي السعادة ما تفارقني ولا تفارق صحابي 

 الحمد الله نتيجتي ظهرت ونجحت صافي .....ياه اخيرا المعاناة بتاعت الكلية ابتدت تقل وان شاء الله تنتهي خالص بالترم ده اهو الكده الواحد رجعلت له الروح الحلوة بدل حالة الاكتئاب اللي كان عايش فيها .....ربنا يكرمنا جميعا وتبقي البسمة علي وشوش كل الناس 

مستني وطول حياتي مستني ........ليالي طوال وصبري طال وطولة البال تهد جبال .......من اكتر الاغاني اللي بحبها لكاريوكي يمكن عشان دايما بتعبر اسلوب حياتي في 5 سنين اللي قضيتهم في الكلية مستني كل حاجة فيها مستني اني انجح مستني اني ابقي انسان مفيد لنفسه ولغيره مش مجرد انه يبقي عالة علي غيره وحاسس انه صفر علي الشمال انا حاليا مستني النتيجة عشان خلاص قربت تتطلع .....يا رب

نفسي الناس اللي عايشة في مصر توصل لمرحلة السلام الروحي .....يعني ما ينفعش ان كل واحد يدي ضهره للتاني .....طبعا انا بتكلم علي الشباب اللي من مختلف الاتجاهات الفكرية لان كل الساسة الكبار دول ما فيش امل منهم في اي حاجة ......وعاجلا ام اجلا هيختفوا من الساحة ....فلازم كل الشباب تقعد وتتكلم وتحاول توصل لارضية مشتركة ما بينهم ويطرحوا افكار مفيدة للبلد في شتي الاتجاهات .......عشان نوصل ان شاء الله لاقوي 20 اقتصاد علي مستوي العالم بعد 20 سنة مثلا حلم جميل بحلمه نفسي يتحقق .....يا رب 

من اسبوع كان عيد ميلادي وتميت 23 سنة .......بس حاسس ان عمر ده عمال بيضيع علي الفاضي لا في حاجة مفيدة لنفسي ولا مفيدة للي حواليا .....ممكن ده ما يبقاش حالي لوحدي حال ناس كتير لكن بجد لما بشوف ناس كانوا معايا في المدرسة معايا وبسم الله ما شاء الله بقوا حاجة محترمة وتفخر انك كنت معاهم وتعرفهم .....بيجيلي احساس بالحسرة علي نفسي وعلي الوقت الكتير اللي كنت بضيعه في حاجات تافهة وملهاش اي لزمة بس ان شاء الله في المرحلة اللي جاية من حياتي هحاول ولو علي الاقل اعمل حاجة افيد بيها نفسي 

في ناس بتدعو مظاهرات ل 25 يناير تاني عشان ان مطالب الثورة متحققتش من سنة 2011 لغاية دلوقتي وان حق الشهداء لسه ما رجعش ده غير ان في احداث دموية حصلت زي الاتحادية وحوادث قطارات كتير اسيوط والبدرشين وغيرهم السؤال الذي يطرح نفسه الان ....ماذا بعد 25 يناير يعني لو افترضنا ان الناس نزلت المظاهرات ونادت باسقاط النظام ايه هوا هيكون رد فعل الرئيس ....ماذا لو لا قدر الله لو تم استخدام العنف لفض المظاهرات من قبل الشرطة هيكون رد فعل الناس ايه ده غير انه لو سقط النظام البلد هيبقي حالها ايه ومين هيمسكها كل الاسئلة دي عاوز اجابات محددة يا ريت كل واحد يفكر في الاجابات دي كويس 

دايما بحس براحة نفسية غريبة بعد ما بخلص الامتحانات ....بحس اني رجعت انسان طبيعي مش كأن جاي من الفضاء ولكن يبقي الخوف الاكبر من النتيجة ....ربنا يسترها علينا يا رب احنا غلابة