Shorty Thoughts

من الواضح ان الشهر ولحد نصه مش راضي يسيبني في حالي , ذكريات شغالة عمالة تهري في دماغي ومش بتخلص وانا اصلا ببقي علي أخري ومش قادر استحمل اي حاجة  بقيت حاسس اني لازم اعيش في دايرة من التفكير واني اخاف من اي حاجة اتمناها انها تحصل , اني كنت من سنتين في نفس اليوم ده عرفت بنت كانت جميلة من جوه ومن بره بالنسبة ليا ساعتها وفضلت ابني حاجات كتير حلوة في خيالي توصلني لنقطة الجواز بس وصلت ان البنت دي بره في حياتي دلوقتي وانها غير الصورة اللي كنت راسمها ليها اصلا !  موضوع أن يبقي معايا مبلغ كويس واسافر واعمل اللي انا عاوزه اكتر وقت اتفشخت فيه في شغل وكمان في صرف فلوس لأوقات كنت ببقي معظم الوقت مفلس  حاولت ابدأ في سكة اني اعمل اونلاين بيزنس خاص بيا ومعايا الفكرة وعملت مجهود عليها بس باقي تكاليف التسويق ودي حوار لوحده  ممكن الحاجة الوحيدة اللي بقول انها قربت تخلص هي الكلية بس طلع ميتيني كام سنة عشان اوصل لده  بقيت بحس اني اي حاجة بعملها في حياتي لازم اخرها خازوق ما بتكملش للأخر , طبعا الحمد لله علي كل حال نحمده في السراء والضراء لكن بتبقي برده انت خايف انك ما تعرفش تفرح في حاجة

تقريبا كل ما بيقولوا علي نوفمبر انه سويت نوفمبر بتقفل من الشهر بزيادة أول حاجة انا المفروض باقي ليا مادة امتحنها في الكلية عشان اتخرج خالص من ام الجامعة الوسخة دي وهي في اول نوفمبر وامتحنتها ومستني النتيجة ربنا يكرم واخلص بقي من العذاب ده  تاني حاجة وفعلا اللي وجعاني من قلبي لما عرفت خبر موت هيثم أحمد زكي , من ظروف الوفاة انه اتوفي لوحده وانه راح مشرحة زينهم عشان يبان سبب الوفاة وانه ابوه وامه عانوا برده واتوفوا بسبب السرطان  وان هو قد ايه عاش فترة كبيرة من حياته لوحده تماما : شغله - كام واحد من صحابه وبس مفيش أهل مفيش أي حاجة في الدنيا لوحده  افتكترت تفاصيل موت عمي الله يرحمه ويتجاوز عن سيئاته ويسكنه فسيح جناته لما اتوفي لوحده في البيت وهو كان مريض سكر وقد ايه احنا كلنا اخواته وولاد اخواته قصرنا في السؤال عليه دايما واننا نزوره وانه عاش في مشاكل وهموم كتير كان مخبيها تقريبا عن الكل قعدت افكر هو انا اعرف كام واحد عايش الدايرة دي من صحابي وناس كتير كنت اعرفهم , الحياة قاسية جدا بكل ما تحمله الكلمة انك لو مش متجوز خلاص انت كده بقيت عايش لوحدك حتي لو انت قاعد مع اهلك كده