Shorty Thoughts

زي كل سنة بحب اني اكتب في اخر يوم في السنة واقول ايه اللي حصل علي مدار السنة ....حاجة كده زي حصاد السنة احب اقول انه بالنسبة ليا ما فيش حصاد زي السنة اللي فاتت بالظبط ....لسه بدرس في الكلية ومطالب اني اذاكر عشان هيبقي عندي امتحانات كمان كام يوم ده غير ان مطالب استحمل القرف بتاع المذاكرة وذل الدكاترة والمعيدين كمان سنة من عمري بعمل حاجة مش مقتنع بيها ومش متقبلها من اساسه ....لكن ما املكش غير اني ارضي بقضاء الله واقول انه يصبرني عليه واقعد اضحك علي نفسي زي كل سنة واقول ان السنة اللي جايه هتبقي احلي من اللي قبلها ....مجرد اوهام يا عزيزي اوهام 

الواحد بقاله كتير ما كتبش حاجة ....المشكلة ان جوايا حاجات كتير عاوز اكتبها بس مش عارف ابدأ منين وازاي الفترة دي من اصعب الفترات اللي بمر فيها في حياتي ....حاسس ان كل شئ متشقلب بالنسبة ليا . كل حاجة بحاول اعملها او اوصلها لازم تتوج بالفشل ....اه والله زي ما بقولك كده كمية الفشل اللي موجودة في حياتي غير طبيعية ...فشل في الدراسة ,فشل في العمل , فشل في العلاقات العاطفية ,فشل في التقرب من ربنا ,لدرجة اني فشلت في الانحراف اللي هو اسهل حاجة الفاشل ممكن يعملها مشكلتي في الموضوع ده ان مفيش حد حاسس بمعاناتي في الموضوع .....سواء ان كان من الاهل او الاصدقاء ....وهما معذورين في الموضوع ده لان كل واحد ملهي في حياته وعنده خراه في الحياة اللي شايله جواه ومستحمله  الحمد لله ان الكتابة بتخف من عليا حمل اني اشيل الخرا ده لفترات طويلة ......عارف اني وجعت دماغك علي الفاضي وكالعادة بكتب اي كلام هجص زي اللي بيكتب في الجرايد بالظبط بدعي ربنا انه يصبرني ويفك كربي ويفرج همي هو العالم بحالي ولا شكوي لغير الله لان الشكوي لغير الله مذلة 

احساس مؤلم الفشل لتالت مرة .....بقيت مش قادر افهم ايه اللي بيحصلي ....عملت مصيبة في حد ولا اذيت حد عشان اعاني المعاناة دي ....اللهم لا اعتراض علي قضاءه ....8 سنين في الكلية ومش قادر اتخرج منها للدرجة دي الموضوع صعب اوي .....ولا انا طلعت في المكان الغلط وانا مش واخد بالي طول السنين دي نفسي ربنا ينور بصيرتي ويرشدني للطريق الصح اللي اقدر اكمل بيه حياتي ....محتاجلك يا رب تفرج همي وتفك كربي وتكرمني بفضلك

من ضمن المراحل اللي بعدي بيها في الفترة دي من حياتي .....هي مرحلة التغيير الفكري لحياتي واني ازاي احاول افكر بطريقة ايجابية بعيدا عن التشائم اللي محيط بالمجتمع بتاعي واني اقدر انفذ الخطوات دي فعلا بعيدا عن الكلام والعيش في عالم الاحلام من ضمن الحاجات اللي بفكر فيها هي :ازاي اقدر اكسر الروتين اللي كل واحد بيعيش فيه : يخلص الدراسة وبعدين يشتغل وبعد كده يتجوز ويخلف ويعيش لغاية ما يموت وولاده برده يكملوا نفس القصة بنفس الاسلوب ....الاختلاف بس هيبقي في الاسامي والبيئة المحيطة بيهم مش اكتر كل الاشخاص دي عاشت حياة روتينية مملة ما فيهاش اي نوع من الابداع او التفكير وكل ده عشان حاجة واحدة بيبقي مقتنع بيها اني ازاي هقدر اغير الواقع اللي انا عايش فيه ايوه الواقع تقدر تغيره ...ما دام انت انسان صحتك موجودة وعقلك شغال تقدر تغيره ....حتي لو ظروفك المادية او العائلية سيئة ...حاول انك تفكر في مميزات شخصيتك وانك تستغلها احسن استغلال في تطوير نفسك ربنا خلقنا عشان نفكر ونبني نعمر ...مش عشان نعيش زي الحيوانات نأكل ونشرب وننام وخلاص الواحد نفسه الناس تستوعب كده ويطلعوا من الروتين السخيف الغير مفيد لنفسهم

ساعات الواحد بيمر بفترات في حياته بيبقي محتاج فيها انه يستعمل النسيان علي قد ما يقدر ....بحيث انه يقدر يكمل حياته وما يوقفش عند لحظات معينة ويفضل عايش فيها الموضوع ده ما كنتش عارف اعمله في الاول وكنت غصب عني بفتكر في ذكريات مختلفة واشخاص مختلفة ....لحد ما في مرة قررت اني لازم اتعلم اني انسي عشان لو ما نسيتش مش هعرف اعيش حياتي ولا افكر في مستقبلي المنهار ليا واحد صاحبي دايما بينسي وكنت دايما بلومه علي نسيانه ده وانه في مرة هينسي كل حاجة متعلقة بيه بما فيها اسمه ! بس لما فكرت فيها لقيت انه عايش في راحة بال نسبيا مقارنة بيا ...صحيح انه ما عندوش حاجة يفتكرها لكن قادر انه يتعايش مع نفسه بسلام مش زيي النسيان فعلا شئ مفيد لصحة البني الادم 

لما بقعد اشوف شريط حياتي طوال 24 سنة اللي فاتت بحاول اشوف انا ايه اللي عملته في حياتي مفيد ان كان ليا او لغيري ....لما ابتديت يبقي عندي وعي كان عندي حوالي 8 سنين اتعلمت فيهم الكمبيوتر ايام الدوس ولعبة wolf و lotusو prince وغيرها من لعب الزمن الجميل .....كنت بعمل فيها محترف عشان كان ابن عمتي بسم الله ما شاء الله عليه كان محترف بمعني الكلمة في كل شئ يتعلق بالكمبيوتر واتعلمت منه حاجات كتير ولسه بتعلم منه لغاية دلوقتي ....ده جزء لما دخلت الاعدادية كنت مسحول في الكورة والماتشات اللي كانت بتتلعب في الطلائع سواء ان كان خماسي او نجيلة ...كانت صحة الواحد كويسة ثانوي بقي يعتبر بداية الانحدار في الدراسة وساعات الاخلاق بس مش قوي يعني .....دخلت الجامعة حياتي اتصفرت من بعد اول سنة وعمالة تنقص لغاية ما بقيت مديون بالسالب القصد من ده كله ان انا حوالي عشت حياة بتاع 12 سنة كان ليا صحاب واسلوب حياة بغض النظر ان كان صح ولا غلط لكن حاليا بقالي 6 سنين مش باين ليا لا لون ولا طعم ولا ريحة ....اصحاب بيقلوا , صحة في النازل , بقيت انام اكتر من الاول زي العواجيز , حالة نفسية سيئة للغاية شكلي كده دخلت في مرحلة ا

الواحد لما كان في المدرسة كان دايما بيتبسط انه بيخلص امتحانات ويأخد الاجازة عشان ينزل يلعب كورة او يقضيها خروج مع اصحابه ويسهر علي التلفزيون او يلعب علي الكمبيوتر ....دلوقتي الواحد لما بيأخد الاجازة ما بقاش بيحس بفرق عن اللي كان بيعمله في الدراسة الا انه كان مفروض عليه المذاكرة عشان الامتحانات .....حقيقي الواحد زعلان انه في كل اجازة بيأخدها مش بيستفاد منها خالص سواء ماديا او انه يطور من مهاراته الشخصية في تعلم لغة جديدة مثلا او معرفة حاجة معينة في تخصصه ان شاء الله الاجازة دي احاول اني اطلع مستفيد منها علي قد ما اقدر