Shorty Thoughts

النهاردة اخر يوم في السنة بنودعها بكل ما فيها حلوها ومرها وتبقي السنة الجديدة افضل واحسن من اللي قبلها .....ربنا يحفظ مصر والبلاد العربية من كل سوء

دايما ببقي خايف من الامتحانات عشان بتفكرني وذكريات قديمة مؤلمة .....ان شاء الله ربنا يكرم في امتحان بكره ويعدي السنة دي علي خير

النهاردة الجمعة قبل يوم الاستفتاء علي الدستور اللي هيبقي بكرة ......انا مش هقول قول نعم ولا قول لا انا هقول حاجة واحدة بس......اعمل الصح وما يهمكش حاجة ............عاوز تقول نعم قول نعم عاوز تقول لا قول لا عاوز تقاطع قاطع المهم تعمل اللي شايفه صح من وجهة نظرك. يا رب تبقي الرسالة وصلت

في ظل هذه الظروف الحالية التي تمر بها البلاد ........قررت الحكومة فرض جديدة ضرائب علي بعض السلع  ده مش كلامي ده كلام الحكومة ....بعد اصدار الاعلان الدستوري الثاني اللي بيلغي الاولاني (ارجع للصحف والمواقع الاخبارية واليوتيوب عشان مش هقعد اشرح الموضوع من اوله ) تم زيادة الضرائب علي بعض السلع زي السجائر والمشروبات الغازية وسلع اخري (ارجع للصحف عشان مكسل اكتب ال 50 سلعة ) المهم انه بكده تم القضاء علي فئة محدودي الدخل (اللي الريس بيبقي منحاز ليهم علي طول) وطبعا المهمشين والفقراء دول مش محسوبين علي الدولة الا بس في المواليد والوفيات مش اكتر مجرد رقم  وفئة الاغنياء مش هيفرق معاها حاجة لما يزهق من البلد هيأخد بعضه ويسافر كل ده عشان نسد العجز اللي في الموازنة العامة للدولة ويا ريتها بتتسد ....اصلها دايما مخرومة   حد فاكر المطالب بتاعت 25 يناير قبل ما المطالب تتصعد ....عيش حرية عدالة اجتماعية متحققش ولا حاجة منها لغاية دلوقتي ...وعمالين يقولوا نحمل الخير لمصر ...ده انتوا طلعتوا بتأخدوا خير مصر حسبي الله ونعم الوكيل فيكم واحد واحد يا ظلمة انتظروا ثورة الجياع 

بيسيطر علي الشارع المصري حالة من الغموض في معرفة ما يدور علي الساحة السياسية من صراعات طويلة المدي علي السلطة ....وطبعا كل ده مع عدم مبالاة من الرئيس او الحكومة او القوي السياسية بحال المواطن الغلبان اللي بيشقي عشان لقمة عيشه بل وصل  الامر لحشد المؤيد والمعارض كوسيلة للضغط علي الطرف الاخر واخضاعه اتهم كل الاطراف بالانتهازية والسعي وراء مطامع شخصية ...حسبي الله ونعم الوكيل فيكم وفي كل مصاب او واحد يموت عشان صراعتكم القذرة دي 

يوم الخميس اعلن رئيس الجمهورية عن اعلان دستوري بيحصن اللجنة التأسيسية لكتابة الدستور ومجلس الشوري.....انا مش هتكلم في نقطة مؤيد ولا معارض انا هتكلم في رد فعل كل مؤيد ومعارض .....مفيش اسلوب راقي في الحوار بين الاتنين كل واحد واخدها بالدراع وادي النتيجة ناس بتخسر بعض ويا ريتها جت علي قد كده لأ بيموتوا بعض كمان.....اتقوا الله حرام عليكم هتضيعوا البلد وهتضيعوا معاها احب اترحم علي الاتنين اللي ماتوا جيكا واسلام ربنا يرحمهم ويسكنهم فسيح جناته ويلهم اهلهم الصبر والسلوان ....وحسبي الله ونعم الوكيل في كل واحد كان سبب في موت جيكا واسلام

مصر من بعد الثورة للاسف وهي في النازل عكس المتوقع .....اضرابات في كل حته وخلافات سياسية بين كل القوي وفي الاخر الشعب هوا اللي بيعاني زي قبل كده لحد امتي هنفضل علي الوضع ده ....لحد امتي هيفضل هم كل القوي السياسية مصالحهم الشخصية وبس ويجوا ساعة الانتخابات  يفكروا في المواطن عشان يديهم صوتوا بس مش اكتر وبعد الانتخابات كله عارف اللي بيحصل  لحد امتي هيفضل ناس بتموت نتيجة الاهمال وما حدش بيتحاسب ولا عنده احساس بالمسؤلية سواء مدير او موظف او عامل حتي  والدولة بتعامل المواطن علي انه رقم يتكتب في سجلات المواليد وسجلات الوفيات  كده هنفضل طول عمرنا محلك سر ....كل الدول اللي بعدينا بتعدينا واحنا عاشين علي امجاد زمان ..قول الزمان ارجع يا زمان !! الناس بتفور ولو انفجرت ما حدش هيقدر يوقفهم والمرة دي هتبقي ثورة جياع هتأكل الاخضر واليابس ....احذروا غضب الملايين 

لأول مرة أحس اني داخل في منعطف تاريخي في حياتي هيفرق معايا كده ...كل ما أفكر اني باقي ليا سنتين في ام الكلية دي بيجيلي احباط بس ساعات بفكر فيها مش ممكن انا أتاخرت عشان ابقي غير كل الناس اللي خلصت كلياتها علي طول وفضلوا قاعدين في البيت او يقعدوا علي القهاوي واللي يشتغل فيهم يشتغل حاجة مش في مجاله ويطلع عين اهله عشان القرش  جوا دماغي افكار كتير كل ما أحاول ارتبها تتلخبط تاني ....نفسي احس اني ماشي في الطريق الصح بدل ما انا تايه كده  يا رب ارشدني للطريق الصح 

الواحد بالرغم من العكننة اللي هوا فيها معظم الوقت ان ما كنش كله مبسوط .... بقي بيبص للحاجة من كذا ناحية مش من ناحيته هوا بس وبالذات لما حاجة انت شايفها وحشة لكن هي بعدت عنك حاجات كتير جدا اوحش منها عشان ربنا مش عاوزك تتأذي بسببها فأعرف ان ربنا بيحبك ام عملك الحاجة الوحشة دي ليك ....ترتيب ربنا لحياة الانسان نعمة من نعمه مش حاسس بيها  دايما بفتكر الاية اللي بتقول (وعسي ان تكرهوا شيئا وهوا خير لكم ) صدق الله العظيم .......الحمد لله علي كل حال 

مش عارف بقالي فترة عمال بسترجع ذكريات قديمة بقالها زمن ...من أول ما دخلت المدرسة وكنت بعمل ايه في الحضانة ، مرورا بإبتدائي والهبل والعبط اللي كنت عايش فيه ...وفترة إعدادي اللي كنت مقضيها كرة طول الوقت رغم اني مليش فيها لكن كنت بأخد الكورة واجري وخلاص واشوط بكل قوتي واطلع الكورة بره سور المدرسة وتضيع ،أما فترة ثانوي كانت ما بين الشات والدروس  والحب الاول وشغل المراهقين اللي ملوش لزمة ده   الفترة اللي مش فاكرلها حاجة هي فترة الجامعة مع ان الفترة دي عند ناس كتير من أحلي الفترات اللي بيقضوها في حياتهم كلها ...لكن   معايا الموضوع ماشي بالعكس مش عارف ليه .... يمكن عشان مش حابب الكلية ولا اللي فيها ومش عارف اتعود عليها لغاية دلوقتي بالرغم اني فيها بقالي 5 سنين ولسه هقعد فيها سنتين كمان .... وحاسس اني هعنس  بسبب الكلية دي وهبقي تباع مع سواق ميكروباص  نفسي استغل الذاكرة الحلوة دي في حاجة مفيدة ليا .....ربنا يكرم يمكن اعرف استفيد منها  ملحوظة : ممكن ما تفهمش انا عاوز اوصل لايه من اللي كتبته ده لكن انا كنت بفضفض مش اكتر من الوجع اللي جوايا 

ساعات بحس اني ما عنديش احساس ....يعني المفروض الانسان يبقي بيحس بالفرح في المناسبات السعيدة ويبقي حزين في المناسبات الحزينة .....يعني يبقي في احساس في الاخر . انا بالنسبة ليا الموضوع مش كده لا بكون فرحان في المناسبات السعيدة ولا بكون زعلان في المناسبات الحزينة ....حاسس اني عندي تبلد في المشاعر  حد عنده نفس المشكلة دي زيي ؟؟؟؟!!!! لو حد عنده الحل يا ريت يقولي 

عزيزي الأهلي والزمالك ....بما انكم هتلعبوا النهاردة في تصفيات دوري أبطال أفريقيا أحب اقولكم لا تمثلون اي قيمة بالنسبة لي وما يفرقش ان كسبتم او خسرتم لاني مقتنع اللي انتم لا تمثلوا مصر في الرياضة ولا اي فرقة مصرية غيركم ....ويقولك افضل الفرق العربية ....روحوا اتلهوا مش انت اللي بيتشكل منكم المنتخب وفرحانين انكم اخدتم كأس افريقيا 6 مرات ومش عارفين تدخلوا كأس العالم وبتتغلبوا من طوب الأرض وبتتحججوا بالملعب والحكم والجو كان وحش وحطولنا سم في الأكل والكلام اللي ملوش اي تلاتة لزمة  خسارة اني اتفرج علي حد فيكم او اديلوه اي اهتمام ..... وأنا مع تجميد نشاط الكورة في مصر لغاية لما ربنا يفرجها ويعملوا كورة جديدة 

الناس بقت محتارة مش عارفة تختار مرسي ولا شفيق ....كل واحد خايف من التاني وخايف من اللي هيعمله في الشعب.شفيق هوا واجهة النظام القديم بس بشكل مختلف وهيتبع نفس النهج للنظام القديم ده رأي معظم الناس فيه .مرسي مرشح احتياطي نازل للاخوان والناس خايفة من انهم بيكوشوا علي كل حاجة مجلس شعب وشوري كمان رئاسة ده كده كتير وان المرشد هيحكمنا والكلام اللي ملهوش لزمة ده ....الاختيار صعب بس الفكرة انه شئ لابد منه ,في رأيي ان المقاطعة شئ ملهوش فايدة وبرجح كفة واحد فيهم عن التاني ..الحل انك تقارن ما بينهم مقارنة عادلة من غير مشاعر تبقي مقارنة منطقية واللي عقلك يقتنع بيه اكتر هوا اللي تختاره وموضوع ان الثورة ضاعت والكلام ده غلط عشان الثورة مستمرة واحنا مش هنقبل اننا نرجع ورا ...واي كان اي حد هيجي فيهم لازم يبقي حاطط حاجة في دماغه الشعب مش هيسكت تاني علي الظلم اظن الرسالة وصلت ربنا يكرم مصر بواحد يحفظها ويصونها من كل سوء

هوا ليه احنا دايما عاوزين لما نختار شئ لازم الشئ ده هوا اللي يمشي ولو ما ممشيش يبقي الناس جاهلين واغبياء ومبيفهموش ...المشكلة اننا ما عنديناش ثقافة الاختلاف كل اللي عاوزينه اننا نفرض رأينا ...يا كده يا نغلط في بعض وخلاص لو فضلنا علي الحل ده دايما متفقين علي اننا نختلف وما نحاولش اننا نوصل لنقطة مشتركة او علي الاقل اننا نحترم رأي بعض حتي لو مختلفين جذريا يبقي هنفضل سنين في خناق وصراعات وفي الاخر احنا اللي خاسرانين  يا ريت كلنا ننسي خلافتنا وصراعاتنا واطماعنا الشخصية ونبص لمصلحة البلد شوية ...الاشخاص بتروح وبتيجي لكن يبقي الوطن اتحدوا بالله عليكم في ان في اتحادكم قوة وفي فرقتكم ضعف يا رب احفظ هذا البلد من كل سوء وارزق اهله من حيث لا تحتسبون

الواحد نفسه يعرف الناس ليه ما بتتعلمش ....كل حاجة يقولك اللي تعرفه احسن من اللي ما تعرفوش ,اصل الراجل ده خبرة وفاهم البلد دي ماشية ازاي وعاوزه ايه ...ما يفرقش بقي الراجل ده شريف ولا مش شريف ,خايف علي مصلحة الوطن ولا لأ عادي ...المهم اننا نستقر مش مهم اننا ما يبقلناش الحق اننا نعيش كمواطنين ليهم حقوق لأ نعشق اننا نكون عبيد انا بقيت حاسس انه في حاجة غلط ونفسي ان الغلط ده يتصلح بس امتي كل ثقتي في الله عز وجل انه  هيحفظ مصر من كل سوء ويعديها علي خير

النهاردة لاول مرة في حياتي هنزل ادلي بصوتي في الانتخابات الرئاسية لجمهورية مصر العربية لعام 2012 .مش قادر اتخيل اني بقي عندي حرية الاختيار اني يبقي ليا رأي في اختيار الرئيس اللي عاوزه يمثلني ...شكرا لكل شهيد ضحي بعمره  ...شكرا لكل مصاب . ضحي بعينه او بجزء من جسمه  عشان نبقي في اللحظة دي كل اللي بتمناه من ربنا انه يولي من يصلح لهذا البلد العظيم وانه يكرمنا ونعدي بمصر المرحلة دي ونبقي في مصاف الدول المتقدمة ان شاء الله الفاتحة علي ارواح الشهداء ...

لكل واحد قرر ان هيقاطع الانتخابات وما يروحش يصوت ....بلاش تديهم فرصة انهم يقوموا بالتزوير في الاصوات روح علي الاقل ابطل صوتك لو مش عاجبك حد من المرشحين عشان ما ترجعناش لنقطة الصفر اللي الشهداء ماتوا عشان نعديها ....حكم ضميرك