مستنقع ذكريات

بقالي فترة حاسس ان مخي مش قادر يطلع من أي ذكريات قديمة وحبة حاجات بتطلع علي السطح مش عارف اعديها


زي انك تبقي طالع من علاقة مؤذية نفسيا ليك وان مشاعرك استنفذت فيها ومش عارف تعوض الحرمان اللي انت بقيت فيه ...بقيت بتتجنب أن أي حد يقرب منك حتي لو بيتعامل معاك عادي وكويس وبحسن نية...بقي عندك شك في كل اللي بيتعامل معاك نتيجة انك اتخدعت في واحدة فعممت التجربة دي مع أي حد بيحاول يقرب منك

اللي مضايقني اكتر ان واحدة قريبتي بتحاول تعمل ده فعلا لكن انا مش متقبل الفكرة اساسا لا انها تقرب ولا انا مجرد تأخد الفرصة اني اعرفها ..عشان مش عاوز أظلم حد بسبب تجربة سيئة مريت بيها وغير كده ان ظروفي المادية أصلا صعبة والدنيا علي القد 

كل اللي بدور عليه الفترة دي أني أقدر أعدي من الاحساس الصعب اللي بمر فيه حاليا اني اتخدعت في واحدة كنت بحبها وكنت مستعد أديها فرصة لو هي غلطت غلط الدنيا كله لكن للأسف طلعت كدابة والكداب عمره ما بيبطل كدب 

حاسس ان قلبي بيوجعني اوي من اللي حصل وان محتاج وقت كبير عشان احس اني طبيعي زي ما كنت في الأول ...يا دوب شميت نفسي من علاقة كانت بعيدة مع واحدة لا أنا كنت في نفس البلد أو هي اجي ادخل في علاقة اسوأ مع واحدة ما حبتنيش اصلا ومجرد عاوزة حد بيحبها ويعوضها عن علاقتها المؤذية اللي كانت فيها 

اللي دايما متأكد منه كل ما افتكر الموضوع ده ان ربنا هيعوضني بواحدة بنت حلال انا عمري ما تخيلت انها هتبقي موجودة أصلا 

سيبك من ده كله كل شئ قسمة ونصيب احاول افكر في الشغل واني اعمل فلوس كويسة وامن مستقبلي واني امشي شغلي الخاص كل حاجة حاسس انها بتوقف ومش بتمشي 

قاعد قلقان ونفسي اخلص مرحلة الجامعة اوي لان خلاص استهلكت طول فترة العشرينات ومابقاش فيا حيل تاني للقرف ده 

الشغل عندي في قرف بس معروف ان اي شغل عادي لازم يبقي في قرف بس الدنيا بتمشي عامة 

ايوه الدنيا بتمشي لا بتقف علي موقف او شخص وكده كده كله بيعدي 

يا رب انت اللي عالم بحالي وجوايا ايه ونيتي ايه أكرمني من فضلك وفك كربي وفرج همي واربط علي قلبي وارزقني من حيث لا احتسب