بداية سنة جديدة

دايما في نهاية كل سنة بنبقي بنفكر في الحاجات لو المواقف اللي مرينا بيها وان في أحلام وطموحات كان نفسنا تتحقق وما اتحققتش وعاوزين نحققها السنة الجديدة

نبدأ بالحاجات اللي ما اتحققتش 

اول حاجة كنت عاوزها اني كنت ارتبط بواحدة كنت بحبها ونبقى على الأقل مخطوبين، ربنا ما ارادش ان الموضوع يمشي لتفاصيل كتيرة وأسباب اكتر لحكمة ربنا وحده يعلمها.... الحمد لله راضي وشاكر فضله ونعمه عليا

ان موضوع شغلي اونلاين يمشي زي ما انا عاوز بالذات موضوع الكورسات ده... ما جبش النتايج اللي عاوزها في الفلوس بالذات ان في حساب اتقفلي بفلوسه وما عرفتش ارجعه... صحيح عملت حساب تاني وماشي فيه كويس بالنسبة اللي شافوا الكورسات لكن فلوس مفيش.... كذلك شغل المواقع في جوجل ادسنس بس نحمد الله على كل حال ولسه قدامي فرص كويسة

تالت حاجة اني اخلص ام الجامعة اللي مش بتخلص دي صحيح قطعت مسافة كبيرة فيها لغاية ما نفسي اتقطع وباقي ليا مادة وما اشوفهاش تاني بس كان نفسي اتخرج في ٢٠١٩ عشان اركز في حياتي من غير قلق واكتئاب واحباط السنين اللي كنت عايش فيه بس ما اعرفش الخير فين

نيجي للحاجات الحلوة اللي حصلت ليا 

ان بعد قعدتي من أغسطس ٢٠١٩ لغاية أغسطس ٢٠١٩ ومن بعد معاناة في ان ادور على شغل ربنا يكرمني بشركة كويسة جنب البيت في المجال اللي كان نفسي اشتغل فيه وانه ابقى في الشركة وانا لسه مش متخرج وأبدأ الشغل من سبتمبر ٢٠١٩ ومع ناس كويسة الحمد لله ومرتب كويس... صحيح في شوية صعوبات بس الحمد لله ربنا ساترها معايا عشان بركة دعا ابويا وامي

كل اللي بطلبه في ٢٠٢٠ ان ربنا ينعم عليا بالستر والصحة ويبارك في عمر ابويا وأمي واي حاجة تانية تتعوض.... وان ربنا يوفقني في شغلي الاونلاين واطلع من نظام الشغل التقليدي من ٩ ل ٥ وانا واقف على رجلي في الاونلاين

اللي عدي عدي واللي راح ما بيرجعش واللي اتكسر ما بيتصلحش واللي بيموت ما بيرجعش.... خلص الكلام على ٢٠١٩ وخلينا نبص للسنة دي ٢٠٢٠ بكل تفائل وخير مهما حصل من خوازيق فيها وان شاء الله ما يحصلش