النصيب والمكتوب

الحمد لله الدنيا ابتدت تتحسن عندي شوية وبدأت انزل شغل واخيرا حسيت ان بعمل حاجة مفيدة بدل قعدتي في البيت 

وسبحان الله الدنيا اونلاين كانت قافلة معايا بقالها فترة يجيلي شغل بمبلغ كويس في حاجة بالنسبة مفيش اسهل منها من حد اشتري مني قبل كده من فترة كبيرة 

علي قد الحمد ما مبسوط ان الدنيا ابتدت تتحرك شوية عندي في ناحية الشغل واني اخيرا ربنا كرمني في مجال كان نفسي اشتغل فيه من زمان ومن ساعة ما بدأت وانا مبسوط بالموضوع ده جدا وان قد ايه الناس في الشركة بتتعامل معايا باحترام والمكان كويس حتي زمايلي اللي في التيم محترمين الحمد لله 

علي قد ما بقعد في الشغل كده بحس ان في حاجة في قلبي بتنهش فيا ....كل ما بسمع اغنية عن الفراق او الحب بحس اني تعبان او لما اشوف اي اتنين مرتبطين مبسوطين بضايق اوي

الاغاني اللي بتأثر فيا اوي اغنية حماقي كان وكان بالذات في حتة وانا اللي فجأني في وسط الحلم نهاية غريبة وما تنفعش حتي لفيلم - اغنية عمر دياب جيت في بالي في حتة فكرة انك روحت مني مش قابلها - انغام طول ما انت بعيد انا بطمن ان انت بخير عشان انا مش ببقي حبيبك غير في الاحزان وغيرهم 

بس التلاتة دول بالذات فيهم مكس غريب من الاحاسيس اللي مش عارف استوعب انها جوايا

اللي هو فكرة انك مخك مقتنع ان العلاقة اللي كنت فيها علاقة مش صحية او بمعني اصح بيسموها Toxic Relationship وانك مسحول دايما في فكرة انك عاوز اللي قدامك يحس بمشاعرك تجاه وهي اصلا مسحولة في مشاعرها مع حد تاني دايس عليها ! 

فكرة انك لازم تضحي عشان تحس بيك وممكن توصل بيك المرحلة ان تأذي او تضر نفسك عشان تستوعب انك بتحبها فعلا 

تحس البنت اللي انت حبيتها وكنت راسم صورة ليك حلوة في خيالك مش هي اللي قدامك في الواقع وانت بتحاول تخلي مخك يأكل حلاوة من خلال قلبك ومشاعرك الحلوة النضيفة ليها 

لما بشوف فيلم Jim Carey مع Kate Winselt  في فيلم Eternal Sunshine Of Spotless Mind وقد ايه هو حبها لما هي قررت تسيبه وتمسح اي ذكري تربطهم ببعض لما اتجوزوا في 5 سنين 

وان قد ايه الواحد ممكن ينسي حد من دماغه لكن المشاعر مش بتتنسي للشخص ده سواء كره او حب


انا عامل زي Jim Carey مخي بينساها لكن بمجرد ما بعدي في اي مكان كان لينا في ذكري قلبي مش بينساها 

أنا متأكد ان حياتها هتمشي عادي وهتعرف الف واحد غيري وكل ما هتزهق هتعرف غيرهم وهكذا بس هي بتهرب من حقيقة واحدة مش قادرة تصدقها وبتكدب علي نفسها بكدبة انها عدت حبيبها الاولاني وانها مش بتحبه وسايباه عندها كده عادي 

وانها طول ما هي مش قادرة تقفل الصفحة بتاعته هتفضل في الدايرة دي مش بتطلع من براها خالص وهو عشان واحد مش راجل وواطي هيعيش حياته ويتجوز ويبقي يشوفها في الوقت اللي ليه مزاج يشوفها فيه ....ده لو قرر يشوفها ساعتها لانه جاحد 

اكتر بني ادم هفضل ادعي ان ربنا  يبتليه بأسوأ عذاب عشان اذي بنات كتير في حياتها منهم البنت دي ....انسان عديم الشعور بالمسئؤلية مستهتر

ساعات ربنا ممكن يهدي البني ادم في لحظة لو ربنا اراد ليها ده يبقي خير ليها بس هو عامة مش خير ليها 

المشكلة الاكبر اني شايفها ان ربنا وصلها لمرحلة انها بقت عامية القلب والبصيرة من كتر ما اتغمست في حاجات غلط وحرام كتير وانها بعيدة عن ربنا 

ان بقي العادي بالنسبة ليها انها تكذب وتبقي مقتنعة ان الكذب ده الحقيقة وان الصراحة دي وقاحة وشئ مقرف ....عشان للاسف الكداب بيكره الصراحة وان حد يواجهه بيها 

وان اللي حواليها لازم دايما يشجعوها علي ده عشان تحس بارتياح وان ضميرها يفضل ميت ما يصحاش 

انا ما املكش ليها غير اني ادعي ان ربنا يصلح ليها حالها ويهديها لنفسها ويبعد عنها شياطين الانس والجن 

واني احمد ربنا علي نعمته وفضله حتي لو الحاجة دي عكس رغبتي وارادتي بس ربنا بيدبر الامور لينا وبيختار لينا دايما الصالح 

وربنا يعلم ان قد ايه فعلا كانت نيتي خير في الزواج منها بس ربنا مش ممهد الطريق ليا لسبب هو وحده  يعلمه 

بس انا فعلا مش زعلان في حاجة منها انا مسامح في اي حاجة ناحيتها عامة ....ربنا يوفقها ويبعد عنها ولاد الحرام ويهدي ليها نفسها ويجبر بقلبها ويرزقها من رزقه الحلال