فقدان الرغبة

ساعات الواحد ممكن بيبقي فاقد الرغبة في حاجات كتير جدا في حياته ...يعني انا بقالي فترة كبيرة جدا مش عندي شغف او رغبة في حاجات كتير


ابسط الاشياء علي الاقل : الاكل , مش بيفرق معايا هأكل ايه النهاردة بكره الاسبوع الجاي ....حتي لو في مطعم بيعمل اكل حكاية عادي هشوف الاعلان او لو جبت منه مع صحابي مرة كلنا وخلاص 

الافلام -المسلسلات - المزيكا : عادي مش فيلم ايه نزل او مسلسل ايه او مين عمل البوم ايه ونزل فين 

حتي النزول علي القهوة اللي هو افضي دماغي من دوشة افكار وحاجات كتير ما بقتش احب انزلها او اقعد فيها كتير بصفة مستمرة ولو نزلت عشان ناس صحابي بقالي كتير ما شوفتهمش وعشان ما يزعلوش 

قعدتي بقت متلخصة في اوضة مقفول بابها قدام شاشة اللاب توب وعلي حسب بقي اليوم بيمشي ازاي : حب شغل اي مزيكا شغالة عشان ما يبقاش في صمت قاتل 

خلصنا شغل تمام نبدأ بقي رحلة ال scroll بتاعت Facebook تفتح تقعد نصاية كبيرك تقلب تلاقي ناس بتنزل posts عن عاملين ايه في حياتهم ووصلوا لايه دول حبة ...التانيين امراء واميرات الاحزان في نفسهم over rated فشخ 

نوع تالت ضارب ابوها صرمة وقالب Facebook كوميكس - والرابع اللي هو زيي بيعيش دور العميق مجرد بس عشان عنده ناس كتير بره مصر يبقي متابعينه عشان بحكم شغلي الناس دي الاساس اللي بشتغل بيه 

تفتح Twitter كأبة الدنيا كلها تلاقيها تروح قافله - نفتح بقي Instagram صور و stories تبين بقي ليك قد ايه الناس مبسوطة ومفيش بقي اي مشاكل في الحياة وانت الوحيد تقريبا اللي عندك مشاكل ومحتاج تشوفلك صرفة او تروح تدفن نفسك


المكان الوحيد اللي ممكن برتاح فيه نفسيا شوية YouTube



خلصنا بقي خلاص كل الكلام ده يا قدامك حل من الاتنين يا تفتح تتعلم حاجة عشان تطور من شغلك اونلاين وده علي حسب الظروف او انك تدخل تنام وغالبا ده اللي بعمله



حياة مملة روتينية مفيهاش اي جديد ومش بتوصل فيها لحاجة مجرد بني ادم عايش بيأكل بيشرب يشتغل ينام وكله من مكان واحد في اوضته علي سريره


فطبعا لما الناس تيجي تتعامل معاك وتلاقيك بتبقي ساكت كتير ومش عارفين اللي دماغك هيستغربوك فشخ انت ازاي كده غريب مريب رهيب


ما حدش فكر فيهم ولو للحظة يسمعك او يحاول يفهمك يمكن يخليك تطلع من ده - لا لازم تصنف انك شخصية صعبة وعنيدة وانك مش زي الناس ....علي قد ما ربنا ميزني انه ادالي القدرة اني اعرف اتعلم اكتر من حاجة كويس وبسرعة بغض النظر عن فشلي الذريع في الدراسة علي قد ما ببقي نفسي حد يتكلم معايا يفصلي دماغي من الافكار اللي فيها


يحاول يقرب مني ويستحملني شوية اه هيتعب حبة مش مجرد رزالة بس الفكرة انه عشان يفك مفاتيح مقفولة بقالها سنين بقفل محتاج يتنضف عشان يتفتح اصلا - وبالذات في موضوع العلاقات ده 

مجرد الكلام في موضوع العلاقات ده مرعب جدا بالنسبة ليا ...يعني لما بعرف ان حد من صحابي او قرايبي قرر يرتبط او يتجوز بستغربه جدا 

اجي افكر طب ما طبيعي اني افكر اني ارتبط بواحدة تبقي فاهماني وفاهمها بس بلاقي حاجة ....هي هتفهم وهتفك كل الزحمة اللي في دماغي دي ازاي حتي لو انا بحبها وبموت فيها

هبقي برده خايف اني اديها مفاتيح دماغي كلها ...ممكن تكون ذكية جدا انها عرفت حوالي 75 % من دماغي بس باقي لسه 25 % ما حدش بيعرف يفهمهم عني ومحتاج انا اللي اوضحهم


عرفت شخصية جميلة وصلت ليا في حاجات كتير ...علي الاقل صحت فيا مشاعر كنت افتكرت تقريبا انها ماتت بس المشكلة في حاجة عرفنا بعض في وقت كل واحد كان مستوي ومش قادر يعمل حاجة للتاني وعاوز الطرف التاني هو اللي يعمله ده فا اللي هو انت بتتكلم في علاقة مستحيلة او لو مشت هتقعد سنين مش عارف رأسك من رجليك ومعذبين بعض 

ما بقتش عاوز حاجة من الدنيا اني بس اعيش في سلام بجيب فلوس لنفسي ومرتاح البال والبدن وعايش في مكان يحتويني لان غالبا قرار الوحدة ده بالنسبة ليا بقيت بحاول اتأقلم عليه من دلوقتي في حالة اني ما لقيتش الشخصية اللي هتقف جنبي وتطمني و هتخليني اغير رأيي