فضفضة ما بعد نص الليل

في ناس بتعدي في حياتك كتير حبة منهم مش بيأثروا فيك وفي منهم بتحمد ربنا انهم بعدوا عنك وفي منهم بتزعل جدا من جواك لو المسافات ما بينكم بعيدة وانت حاسس ان مفيش تلاقي 

الاشخاص اللي عرفتها تقريبا في اخر سنتين ليا انا ما فيش فيهم شخصية مأثرة فيا فعلا غير حد معين ....غالبا مش هتكون بتقرأ الحاجة دي وفاكرة اني مش بتفتكرها دايما بالخير ولو عليا اني افضل جنبها طول الوقت اي كان صفتي ايه 

بس الفكرة كلها انك ساعات من جواك مش بتعرف تتكلم وتطلع اللي جواك للشخصية المفضلة والقريبة لقلبك - فكرة ان دماغك مش بتبطل تفكير وبتحط كل الاحتمالات دي بتقتل جواك مشاعر انك تقول لحد انك واحشني ما تيجي نتقابل - لو زعلان مني في حاجة تعالي نتكلم وحتي لو عملت كده والشخص اللي قدامك محتاج شوية محايلة انت مش عارف تعمل ده

بتفكر فيها انك ساعات ممكن بتبقي عاوز حد يحايل فيك لمجرد تعرف غلاوتك عنده قد ايه مش لانك زعلان منه جدا - نفسك في الاوقات اللي انت كنت متضايق فيها من حاجة ممكن تكون بسيطة يسألك مالك في ايه احكي يسمع منك 

ممكن ساعات بتبقي عاوز تحكي حاجة عن حياتك ولما بتحاول تحكيها الشخصية اللي قدامك بتبقي تعبانة او مرهقة بصورة ما وانت مش حابب تتقل عليها او انك حاولت تتكلم مرة او التانية وما عرفتش تتكلم معاها بسبب انها مشغولة او عندها ظرف ما فا انت مش من النوع اللي بيحاول كتير هي مرة او التانية ولو ما وصلتش خلاص 

لازم اي طرفين يحاولوا يسمعوا بعض ولو في طرف بيسمع اكتر لازم الطرف التاني يحاول يديله مساحة انه يتكلم عن نفسه يحاول يدخل في تفاصيله زي ما هو بيدخله في تفاصيله هو

فرق طباع الشخصيات ده ما بين اي اتنين بيحسوا شعور كويس تجاه بعض ده بيخلق مسافات كتير بالذات لو الطرفين مش عارفين يوصلوا لدماغ بعض كويس 

وغير كده لو شخص مش مقتنع او راضي بتصرفات الشخص التاني والشخص التاني بيبقي عنده حساسية من الكلام فيها عامة بيصعب الموضوع اكتر واكتر لان الطرف ده هيبقي ساكت وهو مش راضي وبنفس ذات الوقت مش عارف يتكلم عشان اللي قدامه هياخد الموضوع بمنطلق تاني وهو مش بيبقي قصده ده وبيبقي مشكلته انه يعبر صح 

ما حدش فينا مثالي خالص واولهم انا - في حاجات كتير انا عملتها في حياتي ومش راضي عنها سواء معرفة اشخاص او تصرفات ممكن الواحد مش بيطلعها مش موضوع ان حد هياخد انطباع وحش لكن فكرة اني مش عاوز افتكرها عشان لما بفتكرها بضايق انا ازاي كنت كده ساعتها 

حاجات كتير بتيجي في بال الواحد بس ما حدش بياخد ولا هياخد باله منها ولا هيتحس بيها ........ ايه دنيا