مرحلة جديدة في حياتي

تقريبا الفترة دي من حياتي فترة مهمة جدا لازم ابدأ اركز فيها كويس عشان انا بخلص في العشرينات واللي انا كنت بعمله قبل كده ما ينفعش اعمله تاني

في اوائل العشرينات كنت بقعد اجرب اكتر مش شغل واروح من مكان للتاني والدنيا اقعد اخبط فيها يمين وشمال ....لما بصيت علي انا عملت ايه في اخر سنتين قعدت افكر كتير اني ما ينفعش استمر بالمنظر ده

لازم يبقي ليا كارير واضح بتعلم فيه وبطور من نفسي بحيث لما اخلص الكلية المشئومة اللي انا فيها دي تبقي حياتي ماشية بنظام - شغال شغلانة كويسة بمرتب كويس وبتعلم فيها وبعلي زائد اني ماشي في اني بشتغل علي البيزنس الخاص بيا تمام 

عشان اقدر فعلا اظبط اي شئ تاني في حياتي علي الاساس ده لاني لو ما فكرتش في كده انا حرفيا بدفن نفسي بالحيا - عشان انا بشوف ناس صحابي ممكن يبقي شغالين وبياخدوا فلوس وفي المقابل ضاع سنين من عمرهم لا اتعلموا حاجة او عليوا فيها ولا منهم حوشوا شوية فلوس يعمل بيزنس خاص بيهم يعرفوا يكملوا فيه حياتهم 

علي قد ما هيبقي فيها تعب ومعافرة واني هطلع بره ال comfort zone بس علي قد ما هكسب منها نفسيا وماديا ومهنيا قدام جدا 

الحمد لله اني قدمت في شغل ليه علاقة باللي بدور عليه ( marketing - business development ) حاجة بحبها وحابب اني اشتغل فيها واطور من نفسي 

عشان انا فعلا نفسي اخلص من ال telesales خالص لانها كا كارير ملهاش مستقبل وسقفها متحدد 

علي قد ما انا بكره ال telesales ووجع الدماغ والصداع اللي بيجيلك منها بسبب السماعة علي قد ما انا اتبسطت فيها الصراحة - يعني عرفتني حاجة وخلتني احسن English بتاعي ببلاش من غير اي كورسات زائد عرفت فيها ناس فيهم الواطي المصلحجي الوسخ بس برده فيهم الحلو 

كفاية ان الواحد من شركة واحدة طلع بتلات شخصيات جمال فعلا وهيكملوا معايا دايما حتي لو الدنيا فرقتنا شوية وبيتمنوا ليا وانا بتمني ليهم طبعا كل الخير - لما بقعد افتكر لما كانوا بيشتغلوا معايا ونقعد نهزر ونضحك ونتكلم ونروش علي بعض قد ايه الايام دي فعلا حلوة وما تتعوضش - بس نقول ايه الايام الحلوة بتعدي بسرعة من غير ما ناخد بالنا ! 

علي قد برده ما الواحد شاف خوازيق في شركات تانية وكان بيتعامل فيها مع الناس كويس بس طلعوا مش تمام - بس الدنيا كده فيها الحلو وفيها الوحش وحبة فوق وحبة تحت


ربنا يكرم خير ان شاء الله ...الواحد متفائل بالتغيير اللي بيدور عليه وربنا يقدم اللي فيه خير ليا ان شاء الله .