دردشة عن الشخصيات الحلوة

في شخصيات حلوة كده لما بتقابلهم في حياتك بيفرقوا معاك جدا 

بالذات لو في شخصية تلاقيها فاهمة جزء كبير من دماغك اللي مش بتتفهم اساسا وعارفة الي حد ما تتعامل معاك ...طبعا بيطلع عين اهلها معاك لكن انت مش بتعمل كده تقل لا عشان مش مقتنع ان في حد ممكن يحب يبقي قريب منك كده من غير حاجة ... بتبقي مش حاسس بالامان لما تلاقيه بيقرب منك ومش بيدور عليك في مصلحة او حاجة  حابب بس انه يكون معاك .

لو الشخصية دي التعامل ما بينكم سطحي هتتعامل عادي - لكن لو الشخصية دي انت من جواك فعلا حاببها هيظهر منك تصرفات 
ممكن تتشاف وممكن ما تتشافش في التعاملات ما بينك وما بينها - علي حسب الشخصية اللي قدامك هتاخد بالها من ده ولا لأ

انا كشخصية انطوائية بقي عندي تخوف جدا ان حد يعرف تفاصيلي وبالذات لو بنت , يمكن عشان لما الواحد دخل علاقة فاشلة بكافة المقاييس وادي كل مشاعره فيها فحاسس انه بقي عديم الاحساس وانه خايف يحصل نفس اللي حصل معاه قبل كده.

كمان الواحد بيبقي عنده فكرة انه ممكن يبقي متغفل في حاجة بطريقة غير طبيعية ...ان الشخصية دي ازاي بتتصرف علي طبيعتها كده وان الناس كلها شايفة العكس مثلا ....بيبقي في جواك خناقة ما بين عقلك وقلبك تصدق مين والمشكلة انك عاوز تصدق قلبك انها مش زي ما انت عقلك بيقولك خاف وقلق وحرص ....بس عشان انت كانسان مصاب بحمي ال overthinking 
وحساب اي حاجة في كل حاجة مقارنة بالمشاعر مش بتعرف تصدق كأنك بتعمل بلوك في عقلك للشخصية دي بطريقة ما .

بالذات لو شوفت مواقف واحداث انت مخك مش قادر يجمع او يعرف تفاصيلها او انها تحتمل الاحتماليات ....المفروض في حالة زي دي تتكلم مع اللي قدامك تفهم ممكن يوضحلك كتير لكن انت في معظم الاوقات ان ما كانش كلها بتفضل السكوت عشان بيبقي في دماغك سيناريوهات وحوارات ولو حصل حاجة من اللي في دماغك بتشوف اخر الموضوع هيوصل لفين وهتفضل برده ساكت .

وطبعا انت بتقعد كتير في الحوارات دي في دماغك وكل ده الشخصية الجميلة مش واخدة بالها من اللي بيحصل في دماغك وسكوتك المريب ده لان شخصك يا اما عامل مصايب ومخبيها يا اما اصلا عندك social anxiety - depression - overthinking مبهدلينك في حياتك لا هي ولا اي حد تاني هيعرف ايه اللي جوه دماغك واللي بتعاني منه كل يوم تقريبا.

المشكلة الاكبر لو الشخصية الجميلة دي عندها معاناة بصورة ما في علاقة برده قبل ما تعرفها - ساعتها انتوا الاتنين لازم هتقعدوا فترة طويلة جدا عقبال ما تتطمنوا لبعض وده بيبقي مش متحدد لفترة قد ايه - سنة اكتر اقل معتمدة علي الطرفين هيعرفوا يستحملوا بعض لحد فين ولايه وممكن يبقي في طرف مطمن والطرف التاني مطمن ليه بس مشكلته في عقله ان مش قادر يصدق او يستوعب لسه عنده مع ان مشاعره مرتاحة للطرف التاني بس عقله لسه مش عارف - عنده خلل في عمل التوازن ده .


الحل للخروج من الدوامة دي مع طبيعة شخصية زيي لازم الشخصية اللي قدامه تتصرف تصرفات كلها واضحة وصريحة ما فيهاش مبدأ الاحتمالات وانها تحاول توجد وسيلة تواصل مع الشخص دايما بأبسط التفاصيل زي عامل ايه - بتفكر في ايه كلها في هيئة اسئلة بتبين اهتمام اللي قدامك مش لمجرد السؤال وهيبان ساعتها الشخص ده لو تجاوب يبقي هو متقبل اللي قدامه جدا وحابب ده منها لو ما فيش يبقي هو في دايرة عدم الامان وزحمة الافكار .

في الغالب الامور مش بتمشي زي ما انت بتخطط ليها في دماغك لان العلاقات لازم يبقي فيها جزء عاطفة موجود مش عقل بس وانت كشخصية بتميل تفكر بعقلها قبل اي حاجة تانية فمش بتقدر تعمل التوازن ما بين الاتنين وده سبب فشل الموضوع .