تعبان ومخنوق

بحس ان الفرحة حالفة انها مش هتدخل قلبي خالص مهما لو حاولت اعمل ايه

هتبدأ تشتغل وتجيب دخل ممكن يسندك ويساعدك في امور  كتير... مهدد انه يضيع وانك ممكن تبدأ من الصفر وانك مش معاك شغل ثابت عامل ازمة

الدراسة لسه ليك باقي مادة فلازم تستني لشهر نوفمبر ونتيجتك تظهر في يناير 

الانسانة اللي بتحبها من كل قلبك و نفسك توصل معاها لحاجة محترمة وصريح معاها في ان ظروفك صعبةومحتاجها تبقي جنبك.... تطلع هي مش قادرة تستحمل حد وانها في دوامة مش بتطلع منها وانت نفسك تطلعها منها لكن هي رافضه تطلع 

اكتر حاجة فعلا ضايقتني ووجعت قلبي انها ادت طاقة ومجهودها لانسان اقل ما يقال عنه انه راجل.... فكرة انك تربط حد كذا سنة حتي لو بتحبه وانت مش راسم نهاية للطريق ده وصريح في أمور اساسية معاه يعتبر خيانة 

كل اللي بمر بيه معاها انا متأكد انها ملهاش ذنب فيه سواء ان كان من الأهل او ولاد الحرام اللي وجروها في حاجات وحوارات كتير غلط وان حصل عندها لخبطة فقط كل المفاهيم ان كان حلال من حرام او صح من غلط... حتي البني ادم اللي فكرت ترتبط بيه سوء اختيار عمالة بتدفع تمنه لغاية دلوقتي في ان طاقتها ومشاعرها خلصت عليه

مشكلتي اني مش عاوز اخدها معايا في طريق مجهول ليا انا شخصيا والأهم انها هي من الأساس مش حاسسها متقبلة ظروفي المادية من حيث ان اهلي فعلا مش هيقدروا يساعدوني في حاجة لان ربنا عالم بالحال فعلا.... وان انا مطالب ان يبقي معايا شغل ثابت دخل كويس اعرف احوش منه وده هيخليني ادخل في علاقة معاها طويلة المدي اقل واجب سنة عشان نوصل للخطوبة ونفضل بنحاول مع بعض واحنا مخطوبين وعشان اوصل للجواز وطبعا انا مش معايا اي حاجة من أساسيات الجواز سواء طلبات مادية من مهر ومقدم ومؤخر وشقة..... ده حتي لو معايا كل ده ابويا وامي كبار في السن ومحتاجين رعاية ليهم وحد يستحملهم ويراعيهم في وقت ما هكون انا مش موجود فيه لما اكون بشتغل

حاجات كتير عاوزها فيها ومش لاقيها...... نفسي تعوضني عن اي حاجة صعبة او وحشة شوفتها في حياتي وانا كمان اعوضها والله بس مشكلتي اني مش عارف وهي مش عارفة 

فعشان هكون فعلا بظلمها اني احطها في الخانة دي اني ما ينفعش مبقاش صريح معاها في ظروفي واحاول افهمها ده..... وطبعا ده بيتفهم اني بهرب زي ما ممكن اللي قبلي هرب لكن ده اقسم بالله ما هروب ده خوف علي اللي قدامي من وضع هو مش هيقدر عليه ومش هيستحمله حتي لو ده هيكون علي خسارة قلبي.....

انا مش عارف هي هتقرأ ده ولا لأ..... بس والله العظيم انا بحبك من جوه قلبي بس انا شايف ان العلاقة دي انها خسرانة ومش هتكمل وان لو كملت في العلاقة دي هتبقي اذية ليها قبل ما تكون ليا

ربنا يوفقك ويكرمك كل خير ويرزقك بحد يكون احسن مني ويكون ظروفه افضل واحسن وانه يعوضك عن كل تعب او اذي شوفتيه