خنقة روح

ومن هنا ابتدت الحكاية ....خير اللهم اجعله خير اني فجأة اكون مبسوط وفي اكتر من حاجة بتحصل في حياتي احس اني هبدأ بقي اشوف الجزء الحلو اللي في الدنيا لكن ازاي لازم تلبس الخازوق


كنت من فترة حاولت اني انسي حكاية البنت الجميلة اللي عرفتها من فترة عشان خلاص كنت حاسس انها مش بتفكر فيا واني مش في بالها بس حصل اللي ما توقعتهوش انها تبين ان في مشاعر من تجاهها لسه ليا وانها عاوزاني زي ما انا عاوزها بس هي ما كانتش عارفة توصلي ده او اني فاهم غلط والامور متلخبطة في مخي كالعادة

المهم في واحد اخويا وحبيبي هو اللي حاول يقرب المسافات ما بينا بعد ما كانت عمالة تبعد ...المسافات كانت بتبعد من ناحيتي اكتر عشان الظروف الصعبة اللي انا فيها سواء نفسية اني شايف اني شخص عديم المسئولية ومش قد اني اتحمل ان يبقي في شخص يبقي في مسئوليتي وكمان المادية لاني مش قادر اصرف علي نفسي اساسا فما بالك انك هتبقي مربوط ببنت مطالب انك تبقي محتويها ماديا وطبعا معنويا وانت واقع في الاتنين

المهم صاحبنا ده هو اللي قعد يصلح من هنا ويوضح من هنا وانا عامل زي الحجر مش بيلين مش عشان قاسي عشان مش عارف مستقبلي رايح علي فين فمش عاوز اربط حد معايا في سكة انا مش عارف اولها من اخرها

قعد يضغط لغاية ما صحي مشاعري اللي كانت شبه بتموت تجاه البنت الجميلة دي وطبعا بان ليها ازاي اني بحبها اكتر من اي حاجة واني عاوزها فوق ما هي تتخيل بس بمنع نفسي عنها عشان مش عاوزها تتعلق في حبال دايبة 

طبعا انا من ساعة ما قعدنا القعدة دي ودماغي سحلاني اني احل الخازوق اللي انا غارز فيها بأيديا ورجليا فيه ده لمدة سنة تقريبا 

وفي نفس ذات الوقت نفسي اعوضها عن اي لحظة قسوة ممكن تكون حستها ناحيتي ليها بس في ايدين بتكتفني اني كده بأذيها مش بعوضها 

قولت احاول ابني كل حاجة كأني لسه ما اعرفهاش من الصفر ...اشوف ايه اللي ممكن يساعد اني احط حجر اساس كويس وانها تحس فعلا ان في تغيير لغاية ما جينا لاول خازوق

الماديات اللي هي بتبقي اوسخ حاجة في العلاقات وخصوصا لو انتوا الاتنين عاوزين توصلوا للنهاية السعيدة بس هي ليها تجربة مؤلمة ومخاوف ان الشخص  ده هيبقي نسخة من الشخص التاني

المشكلة مش في موضوع الماديات علي قد ما الواحد كان صريح في نقط بيشوفها انها مهمة جدا قبل بداية اي علاقة ...بتتكلم في اساسيات لازم تبقي واضحة ومعروفة عشان الشخص اللي قدامك عارف وشايف هو ماشي في انهي طريق ويبقي ليه حرية الاختيار في الاخر يا يمشي الطريق ده معاك او انه يمشي في طريق تاني


انا بعذر اللي قدامي لان في حاجات هي بتفكر فيها يمكن مليش ذنب بس لازم اني احاول استحملها عشان اللي بيحب حد يستحمله في كل حاجة وفي كل حالاته 

لما جيت اتكلمت في نقطة الماديات واني لسه مش معايا دخل ثابت وان اهلي مش هيقدروا يساعدوني عشان الظروف المادية اللي انا  فيها واني لسه ما خلصتش جامعة وان اهلي ناس كبار محتاج اني اكون معاهم او علي الاقل جنبهم عشان اراعيهم

لاول مرة احس ان اللي قدامي مش مستحمل اللي هو انا اتحط في حاجة زي دي ليه وهو مش ذنبها فعلا ...اللي هو انت مش قد الارتباط بتوافق او بتحاول ليه

وفي نفس ذات الوقت حسيت ان الكلام بيخلص من قبل ما يبدأ ....ان اللي المفروض معايا دلوقتي في اول مطب مش مستحمل امال قدام ايه اللي ممكن يحصل

حاولت اتكلم واوضح ان وجهة نظري اني بحب اوضح الصراحة عشان اكون مش بغش او بضحك عليها لكن هي كانت في عالم تاني وبتقفل الكلام


مش قادر افهم ان كل حاجة في حياتي حاسس الوصول ليها صعب وشبه مستحيل ....تتخرج من كلية مش عارف تشتغل شغل ثابت مفيش تعرف تتبسط في حياتك لأ ....اللهم لا اعتراض ما حدش عارف النصيب ولا الخير فين بس اللي هو انا خلاص طاقتي بتخلص ومش ببقي قادر اني اكمل


محتاج باب من ابواب رحمتك يا رب يتفتحلي ...ممكن انا ما استحقش وعايش ببركة ابويا وامي بس عشان هما البركة اللي عايش بيها اكرمني عشانهم وما تخيبش رجائهم ليك فيا


اللهم فك كربي وفرج همي وارزقني رزقا طيبا حلالا كما تحب وترضي ....اللهم استرني فوق الارض وتحت الارض ويوم العرض عليك

اللهم ان كانت خيرا لي فقربها الي وان كانت شرا لي فباعد بيني وبينها كما باعدت بين المشرق والمغرب

اللهم ان كنت خيرا لها فقربني اليها وان كنت شرا لها فأبعدني عنها كما باعدت بين المشرق والمغرب

اللهم ارزقها الراحة والعفاف والغني وراحة البال والطمأنينة....اللهم فك كربي وفرج همها واجعل لها طريق الخير وباعد بينها وبين شياطين الانس والجن

اللهم امين انك مجيب الدعوات يا الله يا ارحم الراحمين برحمتك نستغيث