تجميعة ذكريات

فترة طويلة عدت عليا في حياتي كان فيها احداث كتير 

عرفت ناس وخسرت واتبسط ان في ناس جميلة عرفتها هما الحقيقة تلات اشخاص اضافوا للناس القريبين ليا


اول شخص ده صاحب صاحبه وجدع في وقت الجدعنة فيه راحت خلاص 

تاني شخص ده تحس ان في شبه كتير ما بينا بس في النحس خاصة  بس هو مقارنة بيا النحس نسبته عالية عنده 

تالت شخصية من اجمل الشخصيات اللي ممكن تعدي عليا في حياتي ....لفترة ما عرفتش حد دايما ابقي حاسس شعور حلو ناحيته


يعني مثلا مجرد ما ابقي في نفس المكان ابقي مبسوط جدا ومش فاهم ايه السبب - ابص بصة كده من بعيد دايما من غير ما تاخد بالها  , لو مضايق او زعلان واتكلمنا شوية الاقي نفسي عادي وبقيت كويس

طبعا الشخصية دي مش هتاخد بالها من الحاجات دي لانها شايفة اني غامض ومش باين ليا ملامح من الاساس وليها حق ....انسان معقد منطوي غير اجتماعي بالمرة هيتفهم ازاي

ساعات كتير ببقي عاوز اتكلم بالساعات والايام والشهور مع الشخصية دي بدون اي ملل ....ببقي مهتم جدا بالتفاصيل اللي تتحكي فوق الوصف بالرغم اني مش بطلب اني اعرف ده ....حابب موضوع المشاركة من الشخصية دي حاجة طبيعية مش مصطنعة وببقي حاطط في دماغي التفاصيل اللي اتحكت كويس بس بخاف اني اتكلم فيها عشان الشخصية اللي قدامك هتفهم انك مركز في حياتها الشخصية بطريقة مريبة - ما انت انطوائي بقي ما حدش فاهملك حاجة طيب ولا شرير  

من ناحيتي يمكن مش بشارك حاجة عشان بيبقي واصل ليا احساس ان الشخص ده ممكن مش مهتم او او لو سمعت هيبقي عادي مش باين نفس الشغف اللي عندي في معرفة تفاصيلها زائد اني نفسي اني احس ان حد بيدخل في تفاصيلي بطريقة غير طبيعية بمجرد سؤال عابر حتي لاني مش بعرف احكي عن حياتي او اي تفاصيل فيها من غير ما حد يسألني وبالذات لو الشخصية دي حابب ده منها

كتير ببقي نفسي اتكلم مع الشخصية دي في اي حاجة حتي لو تافهة بس لما بيجي الوقت اني محتاج اتكلم فعلا بيجي السكوت من ناحيتي بسبب اني بحس الشخص اللي قدامي تعبان مرهق مش في وقت ان حد يتكلم فيه عن مشاكل او اي شئ ممكن يعتبر تافه وبسيط بالنسبة ليه

ميكس الاحاسيس الغريب اللي بيحصل جوايا ده ملهوش تفسير ناحية الشخصية دي اللي هو مش فاهم ازاي ده بيحصل اساسا - معظم الاوقات الشخصية دي في بالي - بفرح جدا في اي حاجة تبسطها بزعل زعل رهيب في زعلها - بخاف جدا لو شايف ضرر عليها سواء نفسي او معنوي 

الفترة اللي الشخصية دي ما كنتش بشوفها بسبب اني سبت الشغل وروحت شغل تاني كانت فترة عذاب ليا - لاننا ما كناش بنتكلم بسبب خلاف حصل - اي مكان او اغنية او ذكري بتيجي في البال لازم افتكر وانا كشخصية مش بعرف اتجاوز الذكريات او المواقف بسهولة سواء ان كانت حلوة او وحشة 

كتير جدا الشخصية اللي قدامك بتفكر تفكير فيك عكس اللي جواك فعلا بس انت مش عارف تشرح ازاي العكس وعشان كده المسافات بتبقي بعيدة في التفكير 

في حاجات نفسها اشوفها في الشخصية دي عشان المسافات تقرب بس الشخصية دي عكسي في حاجات كتير ونقطة التلاقي صعبة ويمكن دي اكتر حاجة بتضايقني بس كل حاجة نصيب 

الموضوع بالنسبة ليا معقد جدا بس علي قد ما هو معقد علي قد ما هو حلو ومبسوط اني بعيشه بطريقة ما - ممكن حد يفتكر انه عذاب لكن انا شايفه انه شئ كويس بيحسسني قد ايه اني عندي احساس بدل ما انا حسيت فترة طويلة في حياتي اني بارد عديم الاحساس 

ربنا يمكن ما اداش الواحد نعمة انه يعبر عن اللي جواه بسهولة لحد وده بيخلي الموضوع بالنسبة ليا صعب ان اي حد يعرف يقرب اساسا وان overthinking و ال social anxiety جايبين الواحد وراه مع ال depression 



فا الحمد لله كناس طلعت بيهم السنة دي لا انا مبسوط ......طبعا من ناحية الشغل وتطوير الذات اتعلمنا شوية حاجات زي الاسباني والتسويق والمبيعات كويس

واخيرا ابتديت حجر اساس مشروع كان نفسه اعمله من فترة كبيرة وماشي فيه الحمد لله بخطوات كويسة وان شاء الله يفرق معايا الفترة الجاي لو مشي زي ما انا مخططله بالظبط