تغيير في مسار حياتي

لأول مرة من فترة كبيرة جدا احس ان حياتي حصل فيها احداث كتير بعيدا عن حياتي في التعليم وكفاحي فيه ....اخر مرة كتبت فيها من ساعة ما سقطت للمرة الرابعة واني لسه قاعد تسع سنين في الكلية بدل تمانية

رجعت تجربة اني انزل اشتغل تاني بعد تقريبا ست سنين وانا قطعت الفكرة من دماغي واشتغلت شغل من البيت بس مش مجزي بالنسبة ليا ومش مضمون زي ما كان في الاول ....قررت ساعتها اني هنزل اشتغل شغل يخليني احتك مع الناس والحياة مش من ورا الشاشة ....وقولت احسن شغلانة اتعلم منها مهارات واني اتعامل مع ناس كتيرة واكتسب خبرة كويسة منها هي السيلز

فقولت اتوكل علي الله وادور ...طبعا عشان انا لسه مش متخرج دورت كتير لغاية ما لقيت شغلانة مندوب مبيعات داخلي في شركة فلاتر ميه ...صحيح كان المرتب شئ لا يذكر والعمولات شرحه لكن قولت ما دام جنب البيت وتلات او اربع ساعات مش مشكلة اديني مش خسران حاجة وبتعلم ...بس للاسف ما استمرتش لان صاحب الشركة طير الفريق كله ونصب علينا بشياكة وهما يا دوب الشهرين اللي قعدتهم فيها ....علي قد اللي حصل ده لكن الصراحة الواحد اتعلم وقابل ناس كتيرة اصحاب شركات ناس شقيانة وتعبانة ناس بتعافر في الدنيا واللي يشوف بلاوي الناس تهون عليه بلوته

في الفترة دي عرفت بنت كنت متخيل انها الشخصية المناسبة ليا لكن للاسف كسرت كل توقعاتي فيها 

المهم بعد ما رجعت عاطل تاني عن الشغل قعدت ادور علي شغل تاني وابعت ايميلات وادور في الفيس واروح انترفيوهات لغاية ما ربنا رزقنا بمكان سبحان الله كنت باعت ليه قبل ما اروح الشغلانة اللي كنت فيها ....المهم كلموني وعملت انترفيو واتقبلت ودخلت تدريب وكنت متوقع اني اطلع لقيت نفسي بفضل ربنا دخلت ...قولت ممكن اطلع في فترة التقييم اللي محطوطة ليا وربنا اراد اني اكمل ....في الفترة دي اللي كانت تلات شهور شوفت ناس غير اللي كانوا في شغلي القديم ...اكتر من حد كنت بحكم عليه من خلال مظهره لكن المظاهر فعلا بتخدع الواحد ...اللي كنت شايفه كويس طلع وحش والعكس صحيح ولاول مرة في حياتي ابقي بروح شغل وانا مبسوط فيه الحمد لله مش متكدر وببقي زعلان ان اخر يوم شغل بيخلص واخد اجازة ....ربنا يديمها عليا نعمة يا رب شاكر فضله عليا مع اني ما استاهلش كل كده لكن ممكن بكرم دعوة ابويا وامي ليا


وفعلا الاوقات الوحشة مهما لو طالت مسير الاوقات الحلوة هتيجي